Diwali 2024 ఈసారి దీపావళి ఎప్పుడొచ్చింది.. లక్ష్మీదేవి పూజా విధానం, శుభ ముహుర్తం గురించి తెలుసుకోండి...

Diwali 2024 ఈ ఏడాది దీపావళి పండుగ తేదీకి సంబంధించి కొంత గందరగోళం నెలకొంది. ఎందుకంటే అమావాస్య తిథి అక్టోబర్ 31, నవంబర్ 1న రెండ్రోజుల పాటు వచ్చింది. ఈ సందర్భంగా దీపావళి పండుగను ఎప్పుడు జరుపుకోవాలి.. లక్ష్మీ పూజా విధానం, శుభ ముహుర్తం గురించి ఇప్పుడు తెలుసుకుందాం...

Diwali 2024 హిందూ మతంలో దీపావళి పండుగకు ప్రత్యేక ప్రాముఖ్యత ఉంది. హిందువుల అతి పెద్ద పండుగల్లో దీపావళి ఒకటి. తెలుగు పంచాంగం ప్రకారం, ప్రతి ఏడాది కార్తీక మాసం క్రిష్ణ పక్షంలో అమావాస్య తేదీన ఎంతో ఉత్సాహంగా దీపావళి పండుగను జరుపుకుంటారు. అయితే కొందరు వ్యాపారులు మాత్రం పాడ్యమి తిథి నాడు దీపావళి వేడుకలను జరుపుకుంటారు. ఈ దీపావళి పండుగ మన దేశంతో పాటు ప్రపంచంలోని అనేక ప్రాంతాల్లో జరుపుకుంటారు. అన్ని పండుగలు ఒకట్రెండు జరుపుకుంటే దీపావళిని మాత్రం ఐదు రోజుల పాటు జరుపుకుంటారు. ఈ పండుగ ధన త్రయోదశి నుంచి ప్రారంభమవుతుంది. దీపావళి రోజున లక్ష్మీ గణేశుడిని, కుభేరుడిని పూజిస్తారు. ఈ నేపథ్యంలో ఇప్పటికే దీపావళి పండుగకు అందరూ సిద్ధమవుతున్నారు. నవరాత్రులు ముగిసిన వెంటనే దీపావళి వేళ పూల దండలు, ప్రత్యేక అలంకరణలు చేయనున్నారు. హిందూ మత విశ్వాసాల ప్రకారం, దీపావళి వేళ లక్ష్మీదేవి వైకుంఠం నుంచి భూలోకానికి వస్తుందని చాలా మంది నమ్ముతారు. అంతేకాదు అలంకరణలు, పరిశుభ్రంగా ఉన్న ఇంట్లో నివాసం ఉంటుందని విశ్వసిస్తారు. ఇదిలా ఉండగా ఈ ఏడాది దీపావళి పండుగ ఎప్పుడు జరుపుకోనున్నారు.. ఈ పండుగ ప్రాముఖ్యతలేంటో ఇప్పుడు తెలుసుకుందాం...

Diwali 2024 ఈసారి దీపావళి ఎప్పుడొచ్చింది.. లక్ష్మీదేవి పూజా విధానం, శుభ ముహుర్తం గురించి తెలుసుకోండి...

దీపావళి ఎప్పుడంటే..

శాస్త్రాల ప్రకారం, దీపావళి పండుగను కార్తీక అమావాస్య రోజున జరుపుకుంటారు. అయితే ఈసారి అమావాస్య తిథి అక్టోబర్ 31, నవంబర్ 01వ తేదీన రెండురోజుల పాటు వచ్చింది. దీంతో అందరిలోనూ గందరగోళం నెలకొంది. అయితే వేద క్యాలెండర్ ప్రకారం, ఈ ఏడాది అమావాస్య తిథి అక్టోబర్ 31న మధ్యాహ్నం 3:12 గంటలకు ప్రారంభమవుతుంది. ఇది మరుసటి రోజు సాయంత్రం 5:14 గంటల వరకు కొనసాగుతుంది. ఆ తర్వాత పాడ్యమి తిథి ప్రారంభమవుతుంది. వేద పంచాంగం ప్రకారం, దీపావళి రోజున అమావాస్య తిథి ప్రదోష కాల సమయంలో అంటే సూర్యాస్తమయం తర్వాత నుంచి అర్ధరాత్రి వరకు లక్ష్మీదేవిని పూజించడం ఆనవాయితీగా వస్తోంది. కాబట్టి ఈసారి అక్టోబర్ 31వ తేదీన అమావాస్య తిథి, ప్రదోష కాలం, నిశిత ముహుర్తాలలో జరుపుకోవడం శుభప్రదమని పండితులు చెబుతున్నారు.

శుభ సమయం..

దీపావళి పూజకు అనుకూల సమయం: 31 అక్టోబర్ 2024 గురువారం సాయంత్రం 6:27 గంటల నుంచి రాత్రి 8:32 గంటల వరకు
దీపావళి పూజ కోసం నిశిత ముహుర్తం : అక్టోబర్ 31న రాత్రి 11:39 గంటల నుంచి అర్ధరాత్రి 12:31 గంటల వరకు
ప్రదోష కాలం : సాయంత్రం 5:35 గంటల నుంచి రాత్రి 8:11 గంటల వరకు
వృషభ రాశి కాలం : సాయంత్రం 6:21 గంటల నుంచి రాత్రి 8:17 గంటల వరకు

దీపావళి క్యాలెండర్ 2024

ధన త్రయోదశి 29 అక్టోబర్ 2024
నరక చతుర్దశి, చోటి దీపావళి 30 అక్టోబర్ 2024
దీపావళి, లక్ష్మీ పూజ 31 అక్టోబర్ 2024
గోవర్దన పూజ 02 నవంబర్ 2024
భాయ్ దూజ్ 03 నవంబర్ 2024

కావాల్సిన పూజా సామాగ్రి..

దీపావళి వేళ లక్ష్మీదేవి, వినాయకుడిని పూజించడానికి ముందుగా కుంకుమ, అక్షింతలు(పసుపు కలిపిన బియ్యం), తమలపాకులు, కొబ్బరి, లవంగాలు, యాలకులు, ధూపం, కర్పూరం, ధూపం, మట్టి దీపాలు, దూది, తేనె, పెరుగు, గంగాజలం, బెల్లం, కొత్తిమీర, పండ్లు, పువ్వులు, బార్లీ, గోధుమలు, గంధం, సింధూరం, పాలు, ఎండు ఖర్జూరాలు, తెల్లని వస్త్రాలు, తామర పువ్వులు, శంఖం, వెండి నాణెం, మామిడాకులు, నైవేద్యాన్నిసిద్ధంగా ఉంచుకోవాలి.

దీపారాధన..

దీపావళి రోజున ఈశాన్యం లేదా ఉత్తర దిక్కున శుభ్రం చేసి స్వస్తిక చిహ్నాన్ని తయారు చేసుకోవాలి. దానిపై అక్షింతలు వేయాలి. ఆ తర్వాత ఎరుపు రంగు వస్త్రంతో చెక్క పీటను ఉంచాలి. దానిపై లక్ష్మీదేవి, వినాయక ఫోటోలు లేదా విగ్రహాన్ని ఉంచాలి. ముందుగా గంగాజలంతో శుద్ధి చేయాలి. వినాయకుడి మంత్రాలతో పూజను ప్రారంభించాలి. లక్ష్మీదేవి గణేశుడిని పూజించిన తర్వాత చివరగా హారతి ఇవ్వాలి. మిఠాయిలను, ప్రసాదాన్ని అందరికీ పంచాలి. ఉదయం, సాయంత్రం మీ ఇంట్లోని ప్రతి మూలలో దీపాలను వెలిగించాలి. ఇలా చేయడం వల్ల లక్ష్మీదేవి ఆశీస్సులు లభిస్తాయని పండితులు చెబుతున్నారు.